ਇਕ ਦਾਸਤਾਨ

(ਹਾਦਸੇ ਤੋਂ ਬਾਅਦ)

ਹੰਸੂ ਹੰਸੂ ਕਰਦੀ ਕੁੜੀ

ਹਾਸੇ ਦੀ ਛਣਕਾਰ ਗੁਆਕੇ

ਜਦ ਪਰਤੀ

ਉਸਦੇ ਸਿਰ 'ਤੇ

ਸੁੱਕਾ ਘਾਹ ਉਗ ਚੁੱਕਿਆ ਸੀ

ਉਸਦੇ ਨੈਣ ਸਿਰਫ☬☬ ਤੱਕਦੇ ਸਨ !

ਆਪਣੀਆਂ ਟੁੱਟੀਆਂ ਬਾਹਾਂ

ਆਪਣੇ ਗਲ ਵਿਚ ਪਾਕੇ ਸੋਚਦੀ ਹੈ

ਕਾਸ਼ !

ਜ਼ਿੰਦਗੀ ਉਸ ਮਹਿਬੂਬ ਦੇ

ਖ਼ਤ ਜਿਡੀ ਹੁੰਦੀ

ਜਿਸਦਾ ਚਿਹਰਾ

ਉਸ ਕਦੇ

ਬਚਪਨ ਵਿਚ ਕਿਆਸਿਆ ਸੀ

ਪਰ ਉਸਨੂੰ ਲੱਭ ਨਾ ਸਕਿਆ !

ਹਾਸੇ ਦੀ ਛਣਕਾਰ ਵਰਗੀ ਕੁੜੀ

ਬੁਝੀ ਬੁਝੀ

ਅੱਕੀ ਥੱਕੀ

ਬੰਜਰ ਸੋਚਾਂ-

ਕਦੇ ਉਹ ਵੀ ਨਹੀਂ-

ਆਪਣੇ ਹੱਥਾਂ ਨੂੰ ਲੱਭਦੀ ਹੈ

ਹੱਥ ਕਿ

ਜਿਨ੍ਹਾਂ ਤੇ ਕਦੇ

ਉਸਦੀ ਕਿਸਮਤ ਦੀਆਂ

ਰੇਖਾਵਾਂ ਉਕਰੀਆਂ ਸਨ !

ਕਦੇ

ਆਪਣੀਆਂ ਟੁੰਡੀਆਂ ਲੱਤਾਂ ਨੂੰ

ਵੇਖਦੀ ਹੈ

ਜਿਨਾਂ 'ਤੇ ਬਹੁਤ ਪਹਿਲਾਂ

ਉਸਦੇ ਪੈਰ ਉਗੇ ਸਨ !

ਅਜ ਜਦ ਉਹ ਕੁੜੀ

ਘਰ ਪਰਤੀ

ਉਸਦੇ ਧੜ 'ਤੋਂ

ਉਸਦਾ ਸਿਰ ਵੀ ਗਾਇਬ ਸੀ !

ਹੁਣ ਉਹ ਕੁੜੀ

ਮੋਏ ਹੋਏ ਮਾਂ ਜਾਏ ਦੇ

ਸਿਰਹਾਣੇ ਬੈਠੀ ਭੈਣ ਦੀ

ਚੁੱਪ ਸੀ !

ਸਿਰਫ ਇਕ ਚੁੱਪ !

(ਸ਼ਿਕਸਤ ਰੰਗ)