ਅਗਨੀ -ਪ੍ਰੀਖਿਆ

ਅਕਸਰ ਮੈਨੂੰ
ਕੁਛ ਆਉਂਦੇ ਸੁਪਨੇ
ਕੀ ਕਰਾਂ ਬਹੁਤ ਰੁਆਉਂਦੇ
ਸੁਪਨੇ !

ਇਹ ਸੁਪਨੇ
ਬਣੇ ਮੇਰੇ ਹਮਸਾਏ
ਮੇਰੇ ਅਵਚੇਤਨ ਵਿਚੋਂ
ਕਿੰਝ ਵਿਗਸ ਆਏ !

ਅਕਸਰ ਇਕ ਸੁਪਨਾ
ਉਸ ਕੰਧ ਦਾ ਆਵੇ
ਭੋਰਾ ਭੋਰਾ ਜੋ ਭੁਰਦੀ ਜਾਵੇ
ਉਸਦੇ ਆਸਰੇ ਖੜੀ
ਇਕ ਸੁੰਦਰ ਕਾਇਆ
ਮਿੱਟੀ ਵਿਚ ਰੁਲਦੀ ਜਾਵੇ !

ਦੂਜਾ ਸੁਪਨਾ ਅੱਧੀਂ ਰਾਤੇ ਆਉਂਦਾ
ਸਾਹ ਘੁੱਟਦਾ
ਨੀਂਦਰੋਂ ਜਗਾਉਂਦਾ !

ਇਕ ਗਿੱਲੀ ਲੱਕੜ
ਧੂੰਆਂ ਧੂੰਆਂ ਧੁਖ ਰਹੀ ਹੈ
ਉਸਦੀ ਅਉਧ
ਹੌਲੀ ਹੌਲੀ ਮੁਕ ਰਹੀ ਹੈ !

ਤੀਜੇ ਸੁਪਨੇ
ਮੈਨੂੰ ਬਹੁਤ ਰੁਆਇਆ

ਜਿਸਮ ਨੇ ਰੂਹ ਨੂੰ ਪਰਨਾਇਆ
ਉਹ ਪੱਲੇ ਬੰਨ ਹਾਸੇ ਲੈ ਆਈ
ਕੰਧਾਂ ਨਾਲ ਟਕਰਾਏ ਹਾਸੇ
ਕਦੇ ਅਗਨ-ਪ੍ਰੀਖਿਆ
ਕਦੇ ਬਨਵਾਸ 'ਚ ਗੁਆਏ ਹਾਸੇ

ਖੰਡਰਾਂ ਵਿਚ ਰਹੀ ਭਟਕਦੀ
ਕਿਹੜੇ ਜਨਮਾਂ ਦੇ ਸਰਾਪ ਹੰਢਾਏ
ਇਕ ਵੀ ਹੰਝੂ ਕੇਰ ਸਕੀ ਨਾ
ਆਖਿਰ ਮਿੱਟੀ ਮਿੱਟੀ ਹੋ ਜਾਏ  !