ਲਫ਼ਜ਼
ਚਿਹਰੇ ਰਸਮਾਂ
ਸੁਰਜੀਤ
ਕੋਈ ਖਾਲੀ ਥਾਂ ਹੈ
ਕਿਸੇ ਨੁਕਰੇ
ਧੁਰ ਅੰਦਰ !
ਕੋਈ ਖੂਹ ਹੈ
ਕਿ ਪੂਰ ਹੁੰਦਾ ਹੀ ਨਹੀਂ
ਲਫਜ਼ਾਂ ਨਾਲ
ਨਜ਼ਮਾਂ ਨਾਲ
ਰਸਮਾਂ ਨਾਲ !
ਲਫਜ਼
ਚਿਹਰੇ
ਰਸਮਾਂ
ਇਨ੍ਹਾਂ ਵਿਚੋਂ ਕੁਛ ਗੁਆਚ ਗਿਆ ਹੈ
ਜ਼ਿੰਦਗੀ ਕਿਰਦੀ ਜਾਂਦੀ ਹੈ !
ਕਦੇ ਕਦੇ ਭਟਕਣ
ਬੇਵਜਹਿ ਵੀ ਹੁੰਦੀ ਹੈ
ਆਵਾਰਾ
ਜਹੀ
ਬੇਰੰਗ ਜਿਹੀ !
ਇਹ ਕੀ ਹੈ
ਜ਼ਲਜ਼ਲਾ ਜਿਹਾ
ਜੋ ਤੁਹਾਡੀਆਂ ਨਜ਼ਮਾਂ ਚੋਂ ਨਿਕਲ
ਹੌਲੀ ਹੌਲੀ
ਸਰਕਦਾ ਸਰਕਦਾ
ਮੇਰੇ ਵਲ ਵਧ ਰਿਹਾ ਹੈ !
ਮੈਂ ਤਾਂ
ਕਦੋਂ ਦਾ
ਉਧਰ ਦਾ
ਬੂਹਾ ਭੀੜ ਲਿਆ ਹੋਇਆ ਹੈ
ਕੋਈ ਹਨੇਰਾ ਖਤ ਆਵੇ ਤਾਂ
ਬਾਹਰੋਂ ਮੁੜ ਜਾਵੇ
ਮੇਰਾ ਦਰ ਨਾ ਖੜਕਾਵੇ
ਮੈਂ ਹਨੇਰੀਆਂ ਕੋਠੜੀਆਂ ਵਿਚ
ਹੁਣ ਨਹੀਂ ਰਹਿੰਦੀ !
ਮੈਨੂੰ ਪਤੈ
ਮੇਰੇ ਅੰਦਰ ਸਮੁੱਚੀ ਕਾਇਨਾਤ ਹੈ
ਕਿਤੇ
ਮੈਂ ਉਸ ਨੂੰ ਲਭ ਲੈਣਾ ਹੈ
ਇਹ ਖੂਹ ਮੈਂ
ਸਾਂਵੇਂ ਦੇ ਸਾਂਵੇਂ ਸਮੁੰਦਰ ਨਾਲ
ਪੂਰ ਲੈਣਾ ਹੈ !
ਲਫਜ਼
ਚਿਹਰੇ
ਰਸਮਾਂ
ਨਜ਼ਮਾਂ ਵਿਚ ਹੀ
ਜੜੇ ਰਹਿਣ ਦਿਓ...!
No comments:
Post a Comment